Literatura, música e cine na segunda metade do século XX

Despois da IIª Guerra Mundial, as artes cada vez serán máis permeables e combinaranse entre si. A literatura encontrarase a miúdo coa música, o cinema, as artes figurativas e escénicas.

O poeta grego Odysséas Alepoudhelys, coñecido como Elytis, fíxose  moi popular grazas á versión musical do seu poema To axion estí realizada polo músico grego, falecido en 2021, Mikis Theodorakis.

A música de todos os estilos fixouse en variadas obras literarias para as súas composicións. No eido do hard rock, o grupo Iron Maiden inspirouse na coñecida novela de William Golding para o seu tema Lord of the flies.

Pero o cinema tamén integra textos e referencias da literatura universal da segunda metade do século. Nun recente éxito do cinema de ciencia ficción, o filme Interstellar (Christopher Nolan, 2014), hai unha referencia ao famoso poema Do not go gentle into that good night, de Dylan Thomas. Tamén podedes ver o actor escocés Peter Capaldi interpretando outro famoso poema de Thomas, And dead shall have not dominion.

Pero segundo nos achegamos ás épocas máis recentes, abondan os testemuños audiovisuais dos propios autores e das autoras. No seguinte vídeo podemos escoitar a voz da poeta Sylvia Plath recitando o seu estremecedor poema "Daddy", no que pon de relevo a marca que deixou na súa vida o falecemento de seu pai cando ela era aínda unha nena. Neste texto fai alusións á orixe alemá de seu pai e establece paralelismos entre a súa relación e as actitudes dos nazis cara aos xudeus.

O coñecido cantante Peter Gabriel homenaxea a poesía de Anne Sexton no seu tema Mercy Street. Esta poeta, pertencente como Sylvia Plath á escola da poesía confesional, é outra das figuras poéticas do século XX marcadas por unha tortuosa biografía.